Бізбен байланыс
kum2017@yandex.ru
WhatsApp: +7 705 241 87 47


Жасай бер, жайна – Астанам!

06 маусым 2018, Сәрсенбі
Категориясы: Сценарий
Жасай бер, жайна – Астанам!Жасай бер, жайна – Астанам!Жасай бер, жайна – Астанам!
Мақсаты:
1) Балаларға еліміздің бас қаласы – Астана туралы мәлімет беру.
2) Астана туралы деректермен білімін дамыту, оқушылардың ой - өрісін, шығармашылық қабілеттерін дамытуға, тіл байлықтарын дамыту.
3) Қазақстан Республикасының орталығы Астана қаласын мақтан тұта білуге тәрбиелеу және Отанға деген сүйіспеншілігін арттыру, елжанды азамат болуға тәрбиелеу.
Сабақтың көрнекілігі: Астананың көрікті жерлерінің суреттері, қанатты сөздер, «Астанаға саяхат» видеоклип.

Әдісі: Сұрақ - жауап, ой қозғау, топтық, сезімнен туған өлеңдер, эссе жазу.
Түрі: Сын тұрғысынан ойлау.
Сабақтың барысы:
Ұйымдастыру кезеңі: Амандасу, сыныпты топқа бөлу.
І. Ой қозғау.
Оқушыларға Алтынай Жорабаеваның орындауындағы «Елімнің жүрегі – Астана» әнін тыңдату.
Балалар, біз неліктен «Астана» туралы ән тыңдадық деп ойлайсыңдар?
Ия. Себебі, алдымызға еліміздің ең айтулы мерекесі Тәуелсіздік мерекесі келе жатыр. Ал Астана – еліміздің бас қаласы, еліміздің жүрегі.
Ия, балалар, олай болса, біздің бүгінгі сабағымыз Астана қаласы құрметіне арналмақ.
- Балалар, Астана дегенде естеріңе не түседі?
- Әрине, Бәйтерек, Ақ Орда, Ханшатыр, «Нұр Астана» мешіті.

Олай болса, менің қолымдағы фигураларды алып, топқа бөлініп, топтарымызды қаламыздың айшықты жерлерімен атап, кешімізді жалғастырамыз.
ІІ. Мағынаны таныту. Астана тарихы туралы түсінік.
Әр елдің баласы өз Отанын, туған жерін қадірлей білу керек. Астана – еліміздің бас қаласы. Тәуелсіз Қазақстан – байтақ еліміздің астанасы. Астана – Еуразияның нағыз географиялық кіндігінде орналасқан. Қаланың астана ретінде тұсауы кесілген күн – 1998 жылы 10 маусым. Қаланың негізі 1932 жылы қаланған. Ол Ақмола деп аталған. 1968 жылы Целиноград болып өзгертілді. 1992 жылы қалаға тарихи атауы қайтарылды.
Астана – Қазақстанның жаңа қаласы. Оның шекарасы 710 шаршы шақырым. Тоғыз жолдың торабында, Республика территориясының төрінен орын тепкен.
Астана күн сайын, сағат сайын өркендеп өсіп келеді. Шетелдік қонақтар оны дүниенің сегізінші кереметіне теңеп «інжу маржан» деп бағалауда.

Есіл өзенінің сол жағында, Қазақстанның жаңа астанасына жарқырай енген, жаңа астананың символы алып «Бәйтерек» монументі (биіктігі 97 метр) рухы жағынан да, мағынасы жағынан да бізге, яғни қазақ халқына барынша жақын. Бәйтерек – Астананы құс ұшатын биіктіктен көрсетеді. Шардың ішінде Елбасымыз Нұрсұлтан Әбішұлы Назарбаевтың оң қолының таңбасы бар үшбұрышты күміс бойтұмар орналасқан. Ал «Думан» ойын - сауық орталығында әлемде теңдесі жоқ, ішінде акула, сегіз аяқ, жайын, скат, қылышбалық, бекіре сияқты неше түрлі балықтар жүзіп жүрген мұхиттық аквариум. Кешенде «Джунгли» аттракционы, интерактивті ойындар зонасы, аквапарк бар. Қалада Ұлттық академиялық кітапхана, оқу орындары, Елбасы отыратын Ақ Орда, Тәуелсіздік сарайы бар. Сүйікті Елордамыз Астана қаласы болашақтың қаласы көз алдымызда өсіп келеді.

Бүгінде Астана – тәуелсіз әрі егемен мемлекеттің бүгінгі және болашақтағы саяси, экономикалық һәм мәдени орталығы ретінде қанат жайып барады.
Ерке Есіл жағасында бой көтерген ерекше сәулеттік ландшафты бар, бірегей мүсіндік нышандары сап түзеген, жоғары технологиялы болашаққа ұмтылған, өзгені сыйлап, өзінің жаңа астанасы мен өз елін шексіз мақтаныш тұтатын көп дінді халқы бар әсем де, мейірлі астанамыз, міне, осындай қала.
ІІІ. Қызығушылығын ояту. (Ойларын ортаға салу). Әр топ өз аттары туралы, Астана қаласының айшықты жерлері туралы не біледі екен? Ойларын ортаға салсын.

IV. Викториналық сұрақтар. «Ойлы болсаң – озып көр» айдары.
1. Қазіргі кезде Астана қаласының тұрғындарының саны қанша адамға жетті? (жеті жүз мың)
2. Астана рәмізі «Бәйтеректің» ұзындығы не себептен 97 метр? (Бұл сан астананың Алматыдан Астанаға 1997 жылы көшірілуіне байланысты)
3. Жаңа көпірдің ұзындығы (214 метр)
4. Жаңа көпірге қандай ат берілді? («Сарыарқа»)
5. Астанадағы ең басты қатынас жолы (Республика даңғылы)
6. Көпірдің оң жағалауында тұрған биік ғимарат (Астана Тауэр)
7. Қазақстанның схемалық картасы іспетті парк қалай аталады? («Атамекен»)
8.«Думан» океанариумында теңіз суымен толтырылған қанша аквариум сыйып тұр? (13 үлкен аквариум)
9. Астана қаласындағы газон қанша шаршы метр? (1 млн 200 шаршы метр)
10. 1900 жылы Ақмола уезінің ең мықты балуаны және қара күш иесі кім еді? (Қажымұқан Мұңайтпасов)
11. Қазақстан Тәуелсіздік алғаннан кейін ғарышқа самғаған қазақ ғарышкері кім? (Талғат Мұсабаев)
V. Сыр - сұхбат.

Балалар, келесі Сыр сұхбат айдарында бізде бүгін қонақта білім беру жолында талмай, табысты еңбек етіп, оқушысы Қожақова Айжан мектепті «Алтын белгімен» бітіргені үшін бастауыш сынып мұғалімі Кәдірбай Айман апайларың 2010 жылы бір апта еліміздің жүрегі – Астана қаласына тегін саяхат жолдамаға ие болып, демалып қайтқан Айман апайларыңды қошеметпен қарсы алайық!
Сәлеметсіз бе апай! Хош келдіңіз! Айман апай! 2010 жылы Астана қаласына демалып қайттыңыз. Осы еліміздің бас қаласы, жас қаласында алған әсеріңізді балалармен бөлісе отырсаңыз!
Астана қаласының келбеті сізге қандай әсер қалдырды?
VI. Астанаға саяхат.
Олай болса, балалар біз де Иманғали мен Әлиямен бірге Астана қаласына саяхат жасап қайтайық. Ендеше, экранға назар аударыңыздар.
Рахмет балалар!

Ия, бүгінгі таңда күннен - күнге көркейіп, сән мен салтанаты жарасқан Астана барша қазақстандықтардың жүрек лүпілін еселеп, сәулет өнерінің қайталанбас үлгісін паш етуде.
Ия, жаңа көргеніміздей, Астана қаласы – болашақтың қаласы көз алдымызда өсіп келеді.
VII. Ой толғаныс. «Сезімнен туған өлеңдер» (эссе)
Келесі бөлімімізде балалар, жаңағы сыр - сұхбаттан, Астананың көрікті, айшықты жерлерін көрген бейнетаспалардан алған өздеріңнің әсерлерің жүректеріңнен қандай жыр болып туар екен?
VIІІ. Көрермен көзайымы сыйлығы. Өлеңді жалғастыр.
1. Еліміздің мақтаны,
Еңбек сүйгіш халықпыз.
2. О, Астанам, Астанам!
Жарқыра күндей бас қалам.
Қарыштай бер, қанат қақ,
Ғасырларға бас қадам!
3. Атыңнан айналайын, егемен ел,
Тәуелсіз күннің туы кенеле бер.
Мерейің құтты болсын тәуелсіздік,
Ғасырдың тойы болшы келе берер.
ІХ. Қорытындылау. Бүгінгі сабақтан не түйдік?

Және бүгінгі сабақтан алған әсерлерімізді қолымыздағы фигураларға жазу.
Я, балалар, сабағымызды қорытындылай келе, әрине Астана туралы айтып тауысуымыз мүмкін емес, әрине Астана туралы жырланған жыр, салған ән, шерткен күй қаншама дерсіз?
Астана – үлкен армандар жетегіне еріп, жаңа қала, үлкен шаһар, әлемдік орталық жасалады деген биік мақсаттармен салынған қала.
Бізде тек, Астана – бар қазақтың алтын бесігі, әлемнің қызыға көз тіккен бекзат қаласы болса деген арман бар.
Бізде тек, Астана дегенде бар қазақ елеңдеп, қазақ дегенде Астананың ашық аспаны жарқырай түссе екен деген тағы бір тілек бар.
Осымен, бүгінгі сабағымызды аяқтаймыз! Сау болыңыздар!

Қызылорда облысы,
Қазалы ауданы, Бекарыстан би ауылы
№24 мектеп қазақ тілі мен әдебиеті пәні мұғалімі:
Есенжолова Жанаркүл Ақниетқызы
94 389
0
  • 100
1 дауыс


Жаңалықтар
Астана өлеңі Ермек Өтетілеуұлы
Астана өлеңі Ермек Өтетілеуұлы
Астана қаласы туралы түсініктерін кеңейту, Астана өлеңнің мазмұнын түсініп тыңдау үйрету.
Астана – арман қала
Астана – арман қала
Астана - арман қала. Астана қаласы Қазақстанның жахандық брендіне айналып, дүние жүзіндегі әсем де жас қала ретінде танылуда.
6 шілде Астана күні!, Жайнай берсін, Астана!
6 шілде Астана күні!, Жайнай берсін, Астана!
Балаларға еліміздің бас қаласы - Астана туралы мәлімет беру.
Тасымал. Алматы
Тасымал. Алматы
Астана қаласы, № 8 орта мектебінің бастауыш сынып мұғалімі: Мукашева Зауре Бопиқызы
Астана
Астана
Ойыл ауданы, Жақсыбайкөл негізгі мектебінің 1 класс оқушысы Әділханова Дильназ Алмазқызы
Астананың көрікті жерлері
Астананың көрікті жерлері
Солтүстік Қазақстан облысы, Мағжан Жұмабаев ауданы, Дүйсеке орталау мектебі Ағылшын тілі мұғалімі Сәбитова Әсия Қапезқызы
Пікірлер (0)
Ақпарат
Қонақтар,тобындағы қолданушылар пікірін білдіре алмайды.
×