Менің педагогикалық ұстаныным

Батыс Қазақстан облысы, Орал қаласы,
№30 "Гүлдер" бөбекжайы тәрбиешісі
Дербисова Жадыра Саниязовна

Менің педагогикалық ұстаныным

«Бүгінгі күн - талантты, жігерлі, өзіне сенетін адамдардың, арманға бай және оларды жүзеге асыруға ерік - жігері бар адамдардың уақыты». (Н. Ә. Назарбаев)

Елбасы Н. Ә. Назарбаевтың жыл сайынғы Қазақстан халқына арналған Жолдауында білім саласына аса назар аударылады. Жолдауда бәсекеге қабілетті тұлғаны қалыптастыру - білім берудің ең маңызды бағыты болып саналады. Балабақша қабырғасынан ел болашағы - жастарымыз заманға сай білімнің бастауын алады. Балабақша жұмысымен бала жетістігін өрістетудегі негізгі тұлға - педагог болғандықтан, сол педагог заман талабына сай болуы үшін әрқашан ізденуді, білімдерін жетілдіруді жан - жақты, білікті болуды талап етеді.

Әрбір адам баласы бұл дүниеге келген соң білім алып, болашағын жоспарлап, алдына үлкен мақсаттар қояры сөзсіз. Сол мақсатқа жету жолында аянбай еңбек етеді. Осы секілді менің де бала күннен армандап, жүрек қалауымен таңдаған мамандығым - ұстаз болу. Бәлкім, бала күнімде ұстаздықтың қыр - сырын түсінбей, жәй ғана армандаған шығармын. Бүгінгі таңда осы арманым орындалып, Ақтөбе гуманитарлық колледжін аяқтап, балабақшада тәрбиеші болып еңбек жолымды бастадым. Осы сәттен бастап, педагог болу бала күнгі арманың жетегімен келе салу емес, әрбір баланың жүрегінен жол таба білу, оның бойына білім нәрін құю, қоғамға биім, тәрбиелі де ізгі жүректі бала тәрбиелеу екенін ұғындым. Бұл дегеніміз - адам бағдарын жасаушы. Демек педагог қауымына жүктелетін жүктің жеңіл еместігін, үлкен жауапкершілікті талап ететін ұғындым.

Менің өмірдегі бақытым - мамандығым. Мен педагогпын, келешек ұрпақтың сәулетшісімін. Мен бұны мақтаныш сезіммен айта аламын. Өмір атты сан қалтарыстан тұратын үлкен жолда педагогтан тәлім алмаған жан кемде кем шығар. Тәрбиеші әрбір баланы алғаш балабақша табалдырығын аттаған сәттен бастап тәрбие мен білім айдынына жетелейді.

Ұрпақ тәрбиесі оңай шаруа емес ол орасан мейірімділікті, жас буынға деген жанашырлық пен шексіз махаббатты қажет етеді. Бүгінгі таңда болашақ ұрпақты қазіргі жаңа заман талаптарына сай етіп тәрбиелеу үшін, әрбір тәрбиеші үлкен ізденіс үстінде жүруі керек деп есептеймін. К. Д. Ушинскийдің «мұғалім өзінің білімін көтеріп отырғанда ғана мұғалім, ол оқуды, ізденуді тоқтатқаннан кейін оның мұғалімдігі де жойылады» деген сөзді менің ұстаздық ұстанымым десем болады. Тәрбиешінің әрбір жетістігі, әрбір аттаған қадамы биікке жетелейтін сатыны қалыптастырады. Бұл сатының баспалдағы ретінде мен әрбір ұйымдастырылған оқу іс - әрекетімді ізденіспен, жаңа технологияларды пайдалана отырып өткізуге тырысамын.

Жастар - еліміздің болашағы. Осы болашағымыз жарқын, еліміздің ірге тасы мығым, өміріміздің әрлі болуы үшін аянбай еңбек етуді, ізденуді, білімімді жетілдіріп, көтеріп отыруды алдыма үлкен мақсат етіп қоямын.
Әрбір адам - туысың, досың, жұрағат,
Әрбір сабақ - ұғыну, үйрену, ұлағат.
Әрбір сөздің - шындық, бірлік, адалдық,
Әрбір ісің - тірлік, тілек, адамдық,- деп,
Ы. Алтынсарин айтқандай балаға берген әрбір тәрбием - ұлағат боп, әр сөзім - шындық пен адалдыққа, әр ісім - тірлік пен адамдыққа бастап отырса, еңбегімнің жемісін әрқашанда көремін деген ниеттемін.