Әл-Фараби университеті - тіл меңгертуде озық орында

Әл-Фараби атындағы Қазақ ұлттық университетінің Жоғары оқу орнына дейінгі білім беру факультеті, Шетелдіктердің тілдік және білім беру дайындығы кафедрасына биыл 40 жыл толды. Осы уақытқа дейін аталған кафедра шетелдік білім алушылар үшін аянбай қызмет етіп келеді. Америка, Қытай, Корея, Жапония, Түркия және т.б. көптеген елдерден келетін білім алушылар мен қандастарымызға қазақ және орыс тілдерін меңгертіп, аймақтану, өлкетану сабақтарынан туған жеріміздің көрікті жерлерімен таныстыру бағытында жұмыс жасап келеді. Шәкірттерде ұшқан ұясын ұмытпай әрдайым кафедраға ықыластарын танытып, тіл үйреткен ұстаздарға алғысын білдіруді ұмытқан емес.

Биыл 40 жылдық мерейтой барысынды айтулы іс-шаралар ұйымдастырылды. Нәтижесінде 30 жылдан астам уақыт еңбек етіп келе жатқан ұлағатты ұстаздарға басшылық тарапынан арнай алғыс хаттар мен марапаттар берілді. Лауазымды қызметтер атқарып жүрген шәкірттеріміз келіп, жылы-тілектерін, алғыстарын білдірді. 

Кафедра - Қазақстанға келген шетелдік студенттер мен елге оралған қандастарымыздың алтын ұясы. Олар мұнда қазақ мәдениетімен танысты, орта тапты, еліміздің білім беру, оқыту жүйесін көрді. Алған білімдерінің нәтижесі ретінде жыл сайынғы түрлі жарыс, конференцияларға, іс-шараларға белсене қатысып, жүлделі орындар алып жүрген студенттеріміз саны көп. Сонымен қатар кафедрада Language Park атты тіл орталығы да жұмыс істейді. Мұнда қазақ, орыс тілдерін меңгергісі келетін кез-келген жанға білікті ұстаздар сабақ береді. Мемлекеттік тіліміздің қолданыс аясын кеңейту үшін атқарылып жатқан бұл игі шаралар алдағы уақытта да жалғаса берері сөзсіз.