Жаяу туризм техникасымен тактикасы

Бағдарлама жоспары: Жаяу туризм техникасымен тактикасы
Сабақ тақырыбы: Топтағы міндеттер
Сабақ мақсаттары:
Білімділік: Теориялық алған білімдерін практикалық түрде орындап үйрету, туристік қызметтің белсенділігін арттыру;
Дамытушылық: Туристік дағдыларын қалыптастыру, туристік – спорттық дайындықтарын, икемділіктерін дамыту;
Тәрбиелік: Салауатты өмір салтына, қажетті жағдайда өз бетімен жедел шешім қабылдауға, жауапкершілікке, төзімділікке тәрбиелеу.
Сабақ түрі: Аралас сабақ
Пәнаралық байланыс:- Туризмнің белсенді түрлерінің техникасы мен тактикасы
- Туристік - спорттық дайындық
- Дене тәрбиесі
Оқыту әдісі: көрнекілік, практикалық
Сабақтың техникалық және материалдық жабдықталуы:
- Акт
- Топшамалар
- Суреттер
I. Ұйымдастыру бөлімі:
1. Оқушылармен амандасу
2. Жоқ оқушыларды белгілеу
3. Жұмыс орындарының сабаққа дайындығын тексеру
ІІ. Кіріспе нұсқау
Оқушылардың зейінін жаңа сабаққа бейімдеу (өткен сабақты қайталау, слайд)
1. Туристік құрал – жабдықтар дегеніміз не?
2. Жорыққа қажетті құрал – жабдықтар не түрге бөлінеді?
3. Құрал - жабдықтарға қойылатын талаптар қандай?
4. Құрал – жабдықтарды дайындау жоспары неше пунктен тұрады?
5. Ремнабор құрамына не кіреді?
6. Рюкзакты жинау тәртібі қандай?
7. Жеке адамға арналған құрал – жабдықтар қандай?
Сабақтың тақырыбы мен мақсатын хабарлау:
Топтағы міндеттер жөнінде мағлұмат беру
Жаңа тақырыпты баяндау (конспект)
Жорық жетекшісі – ол ережеге сәйкес жорыққа топты дайындауға және оны өткізуге жауапты. Категориялы күрделіліктегі жорықты ұйымдастырушы кәмелетке толған әрі тәжірибелі болуы қажет. Жорық жетекшісі сонымен қатар физикалық, моральды дайындығы берік, ұйымдастырушылық қабілеті жоғары, кез - келген уақытта мәселені шеше білетін және шешім қабылдау білетін турист болуы қажет. Саяхат барысында топ жетекшісі қауіпсіздік сақтау мақсатында қауіп төнген жағдайда маршрутты өзгертуге құқығы бар. Маршрутты күрделі жолға өзгерту топқа аса қауіп төнген жағдайда ғана рұқсат етіледі. Сонымен қатар топ жетекшісі қажетті жағдайда топ жетекшілігін орынбасарына немесе шебер дайындығы бар топ қатысушысына беруге құқығы бар.
Саяхат жетекшісі міндетті:
- Жорық құжаттарын дайындауға
- Жорыққа қажетті - құрал жабдықтарды дайындатуға
- Жорыққа қажетті азық - түліктің сметасын дайындауға
- Жорыққа шығар алдында әдебиеттерден немесе басқада ақпарат көздерінен саяхат ауданы туралы мәлімет жинақтауға
- Саяхат ауданының физикалық – климаттық ерекшеліктерін зерттеуге
- Маршрутты қауіпсіз әрі көз тартарлықтай жермен жүріп өтуге белгілеуге
- Табиғатты қорғау ұйымынан, тәжірибелі туристтерден кеңестер алуға
- Жорық барысында кешкісін топты жинап күнделікті жорық есебін жүргізіп, ертеңгі күнге жоспар құруға
- Жетістіктермен, олқылықтарды күнделікті талқылап нәтиже шығаруға
- Кез - келген осы ауданда жүрген басқа туристік топқа қажет жағдайда көмек беруге
- Сәтсіз жағдайда басшылыққа хабар беруге міндетті.
Саяхат қатысушылары міндетті:
- Жорық жетекшісінің тапсырмаларын дер кезінде орындауға
- Жорықты ұйымдастыруға дайындық жұмыстарына қатысуға
- Табиғатты қорғау, өрт қауіпсіздігі, су қауіпсіздігі ережелерімен толық таныса отырып, алғашқы медициналық көмек көрсету әдістерін алдын - ала меңгеруге
- Алдын - ала талап етілген мекемеден тексеруден өтуге
- Физикалық дайындығын үнемі жетілдіруге
- Жорық барысында денсаулық жағдайының нашарлағанын жетекшіге жедел хабарлауға
Топтағы жеке міндеттер:
Жетекші орынбасары – Ол жетекшінің тікелей көмекшісі. Топтың тәртібіне жауапты. Жетекшінің бұйрығының орындалуын қамтамасыз етеді. Жетекшіге топтағы жағдай туралы үнемі хабарлап отырады.
Жетекшінің мәдениет жөніндегі орынбасары – ол жорық барысында кешкісін демалу кезінде әр түрлі топтық сайыстар, ән сайыстарын, викториналы сұрақтар, ктк т. б мәдени - демалыстық шаралар ұйымдастырады.
Дене шынықтырушы – ол топ мүшелерінің жорық барысындағы физикалық жай – күйін қадағалайды. Күн сайын ертеңгілік жаттығулар орындатады. Спорттық - сауықтыру шараларын ұйымдастырады.
Шаруашылық меңгерушісі - ол барлық құрал - жабдықтардың түгенділігіне, жеткілікті пайдаланылуына, жарамды - жарамсыздықтарына, құрал - жабдықтардың сақталуына, қажет жағдайда жөндеу жұмыстарына жауап береді. Жорық соңында тазартып, кептіріп қоймаға өткізеді.
Тамақ жөнінен шаруашылық меңгерушісі - ол күнделікті тамақтануға жорықтың аспазына немесе кезекшісіне азық - түлікті мөлшерлеп бөледі. Азық - түліктің сақталуын қамтамасыз етеді. Қажет жағдайда толықтыру туралы жетекшіге мәлімет бері, есеп жүргізеді.
Қазынашы – жетекшімен бірлесіп барлық қаржыландыру ісін басқарады, барлық шығындарды есептеп смета дайындайды. Смета – бұл жорықтағы маңызды құжаттардың бірі. Сметада барлық азық - түлік, жанармай, дәрі - дәрмек т.б. қажеттіліктердің есебін жүргізіп отырады.
Медбике(санитар) – Туристердің күн тәртібін, санитарлық тазалықтың сақталуын, дәрі - дәрмектің қажетті мөлшерде берілуін, топ мүшелеріне қажет жағдайда алғашқы медициналық көмек көрсету, тамақтың санитарлық талапқа сай дайындалуын және таза ауыз су тәртібін қадағалайды. Күнде кешкісін кезекші аспаздың жұмысына баға береді.
Жорық тілшісі – жорық күнделігін жүргізді, жетекшімен бірлесіп саяхаттың есебін жазбаша құрастырады, мәліметтер жинақтайды. Бұл қызмет жорықтағы ең негізгі қызмет. Жорық тілшісі сонымен қатар фото есеп жүргізу мақсатында жорық барысында қызықты ерекше көріністерден фото, видео жинақтайды. Кейін жорық туралы видео ролик дайындайды.
Жаңа сабақты бекіту

1. Жорық кезінде топ мүшелері арасында топтағы міндеттердің болуы маңызды ма?
2. Жорық жетекшісі қандай міндеттерді атқарады?
3. Жетекші орынбасарының атқаратын міндеттері қандай?
4. Жетекшінің мәдениет жөніндегі орынбасары не үшін қажет?
5. Жорық кезінде Дене шынықтырушы болуы манызды ма?
6. Шаруашылық меңгерушісі не үшін қажет?
7. Жорық кезінде қазынашының маңыздылығы қандай?
8. Жорық тілшісі не үшін қажет?
Оқушылар бүгінгі жаңа сабағымыз бойынша қандай сұрақтарыңыз бар?
Егер сұрақтарыңызға толық жауап алған болсаңыздар сабағымыздың келесі бөлімі тәжірибелік бөлімді бастайық!

Жұмыс орнын қарап өткенде:
1. Жұмыс орнының ұйымдастырылуын тексеру
1. Еңбек тәсілдері мен операциялардың дұрыс орындалуын бақылау
2. Технологиялық процестің орындалуын бақылау
3. Жұмыс барысында қауіпсіздік ережесінің сақталуын қадағалау
4. Оқушылардың өзін және өзара бақылауларын қадағалау
ІІІ. Қорытынды нұсқау.
1. Жақсы орындаған оқушылардың жұмыстарын атап өту
2. Қателіктерді сипаттап олардың орын алу себебіне тоқталып өту
3. Оқушылардың бағаларын хабарлау
4. Жұмыс орнын, құрал - жабдықтарды жинастыру

Хатимуллина Бибина Турарбековна
Технологиялық колледж
"Туризм" мамандығы бойынша өндірістік оқыту шебері