Әлемнің жарығын сыйладың сен маған!

Әріптестеріме ұсынатын тағы бір сабағым аналар мерекесіне арналады. Сабақты өткізу барысында ата-ана, мектеп және ұстаздар арасында тығыз байланыс ортатуға болады.

Тақырыбы: «Әлемнің жарығын сыйладың сен маған!»
Сабақтың мақсаты: Балаларды мейірімділікке, инабаттылыққа, адамгершілікке тәрбиелеу.Аналарының өлшеусіз еңбегін бағалауға үйрету. Еліне, Отанға деген балалық махаббатын арттыру.
Сабақтың көрнекілігі: Қабырға газеті: «Аналар – асыл жандар», Ашық хаттар, Интерактивті тақта т.б.

Сабақтың өту барысы:
№1 жүргізуші Армысың, ауылымның асылдары
Жайнасын көңілдердің жасыл бағы
Сендер үшін ән мен күй, өлең мен би
Сендер үшін мереке шашулары
№2жүргізуші Әлемнің жарығын
Сыйладың сен маған
Даланың әр гүлін
Жинадың сен маған

№1 Көктемді қанатына қондырып, жан жылуын көкірегіне толтырып, әйел – аналардың дәстүрлі мерекесі – сегізінші наурыз да ауылымызға келіп жетті.Өздеріңізді анадай шуақты құлпырған қызғалдақтай әсем мерекемен құттықтаймыз!
№2. «Отбасы – шағын мемлекет» деген сөз бар. Ынтымағы келіскен, түтіні түзу ұшқан әрбір шаңырақ – мемлекетіміздің құт берекесі.Әйел ана отбасы жылуын сақтаушы, қоғамның ертеңі, болашақ азаматтарды тәрбиелеуші.

№1.Олай болса бал бөбектеріңіздің өздеріңізге арналған жыр жолдарын қабыл алыңыздар.
Жансая Бүкіл әлем аналардың ақ сүтінен нәр алған
Бүкіл әлем аналардың үмітінен таралған
Әлемде сен болмасаң осылайша
Туар ма еді жүрегімде биік мақсат, игі арман
Нұрмұхамед. Ардақты ана, аяулы ана, қымбаттым
Тәтті ұйқыңды бөліп талай тіл қаттың
Өміріме нәрін берді ақ сүтің
Кең құшағың – аясындай гүл бақтың

Ақнұр. Мен өзіңмен қайда болса біргемін
Махаббатың жүрегімде жүр менің
Күн нұрындай жадырай бір күлгенің
Қандай жақсы ортамызда жүргенің
Жарасқан. Сияқты бір жаздың сұлу нарт гүлі
Құлпырады бүгін міне март күні
Осы күні тасып сенің көңілің
Жас жүректен шықты шалқып шат үні
Ақнүр.Қуанып көз алдымда жүргеніңе
Құмарсың менің келер күндеріме
О, ана, жетсе екен бар өмірің
Қартайған шағымды да бір көруге
№1.Күнде той бола бермес дәл осындай,
Тыншымас көңіл бақыт жол ашылмай
Өмірде саған жақын адам болмас
Төрт бөлген түн ұйқысын анашыңдай

Хор: «Құттықтаймын мама!» әні

Есекен. Адамдықтың ашқан соң қақпасын кеп
Туған елің сүйсіне мақтасын деп
Пәк сезіммен тілеймін адамдарды
Анасының ақ сүтін ақтасын деп
Ақтоты.Мінекей, жер көгеріп көктем келді
Шығарып сап боранды, өкпек желді
Жаңа көктем әкелсін мол жақсылық
Өткен өтті, салауат өткенге енді
№2.Тыныштық баршамыздың ұранымыз
Мәңгілік таусылмайтын жыр - әніміз
Арманның асқарына қанат қаққан
Бақытты бейбіт елдің ұланымыз

Хор: «Анаға сәлем»

Ақтілек. Ақ сүтінен барлық адам нәр алған
Ол азығың өзіңмен бірге жаралған
Туа салып тұңғыш татқан дәмің ол
Күш – қуат боп өн бойыңа таралған
Ақерке. Сенен өскен балалар
Батырлар мен даналар
Құттықтаймыз мейраммен
Құрметті абзал аналар!
Мәди. Ана – адамзат мекен еткен жер шарының әр түкпірінде, әр үйде мейірім мен мерейдің, достық пен туыстықтың туын тіккен адам.
Индира. Ана! Ол біздің елде ардақты адам
Кіші де, үлкені де ардақтаған
Өзінің аяулысы Отанын да
«Ана» деп біздің халық текке айтпаған
Индира. Өмірде ана бақыт, ана – пана,
Өмірді өркендетер ана ғана
Өсірген талай көсем, талай шешен
Талай ер, талай ақын, талай дана.

Нұрғанат. Көңілің Алатаудың ақ қарындай
Мейірімің күннің шуақ шақтарындай
Қалайша аяулы ана тына алармын
Ән болып сағыныштан ақтарылмай
Береке. Ана дейміз бәріміз де аңқылдап
Ана дейді жас сәби де жарқылдап
Ана деген бәйтерегі өмірдің
Ана деген алтын қазық, алтын бақ
№1 Аяулы ана алтын нұрлы анашым
Жүрегіммен мәңгі бірге боласың
Сен асқарсың, сен аспансың биіксің
Сен дархансың, сен жомартсың данасың

Хор: «Ақ мамам»

Перизат. Адам бар ма ана сүтін татпаған
Алуан – алуан ауыр сынды аттаған
Адалдықты ар – намысты сақтаған
Мен өзімнің анашыммен мақтанам.
Нұржау. Туғаннан құлыным деп аймалаған
Өзіңдей қымбат адам қайда маған
Дүние аналармен көрікті ғой
Оларсыз бақта бұлбұл сайрамаған
Нұрдос. Адамзат ең алдымен ана алдында қарыздар. Анақарызы алтынға бөлеуді, ақ орда салуды қаламайды.Ана баласының ер жетіп адам болуын қалауды. Анаға осыдан артық бақыттың керегі жоқ.
Альбина. Ана – деген адамзаттың данасы
Ана - деген сәбилердің панасы ана – деген жарық жұлдыз шырағың
Ана – деген қайнар ыстық бұлағың
Ана - деген өмірдегі қамқорың
Ана – деген сүйенерің жан құрбым.
Анар. Құттықтаймын мейрамыңмен аналар
Әр күлгенің бізге бақыт саналар
Еңбегіңді еш етпейді өмірде,
Елің, жұртың, ұл мен қызың бағалар
№2. Ол ана адамзатқа қанық үні
Әр жүрек, әр көңілдің жарық күні
Ол деген алыбы ғой алыптардың
Ананың тілі емес пе халық тілі

ән: «Мама»

ІІ бөлім.
Анам менің жасыл бағым жайнаған
Сол бағыңда асыр салып ойнағам
Пәк жүректен жыр жазады перзентің
Бар бақытты жалғыз саған сыйлаған -
деп ақын жазғандай қазір балалар сіздерге арнап шағын қолтаңбаларын жазады.Бұл жұмыс кубизм стратегиясы бойынша орындалады. Оқушылар үш топқа бөлініп отырады.
1 – топ.Ана туралы эссе жазу.
2 – топ. Сезімнен туған өлең шығару.
3 – топ. Тілектерін жазу.
Тапсырма орындалған соң:
Бірнеше оқушыға оқыту керек.

Барлық бала орындарынан тұрып «Ана туралы жыр» әнін орындайды.

ІІІ бөлім.

Тренинг жұмыстар жүргізу.
Анасы мен қызына арналған сұрақтар: Шарты: Әр дұрыс жауап үшін қызы 10 ұпай алады, қызы жауап бермеген жағдайда анасы көмекке келеді, ол үшін 5 ұпай алады.
1. Терезені жуу тәсілін айтып бер.
2. әшекей бұйымдарға нелер жатады?
3. Жұмыртқадан қандай тағамдар жасауға болады?
4. Матаның түрін атап бер?
5. Бір асты дайындау тәсілін айтып бер.
6. Ине мен жіпті сабақтау, ұсыну тәсілін көрсет.
7.Жент неден жасалады?
8.Аптаның жеті күнін екі түрлі атап бер.
9.Сиырдың сүті қай жерінде?
10.Қандай кілт аспанда болады?
11.Тұмауды неліктен қауіпті ауру дейді?

Анасы мен ұлына арналған сұрақтар:
1. Бір пакет сүт неше теңге тұрады?
2. Бір келі картоп неше теңге тұрады?
3. Жұмыртқаны қалай қуырады?
4. Сіздердің шаңсорғыштарыңыздың маркасы қандай?
5. Қабырғаға шегені қалай қағады?
6. Шалбар жылтыр болып қалмау үшін қалай үтіктейді?
7. Лампочканы салғанда қай жаққа қарай бұрайды?
8. Сиырды қай жағынан сауады?
9. Атты қай жағынан қамшылайды?
10. Тауық түс көре ме?

«Мен анамды қаншалықты білемін?» байқауының сұрақтары:
Шарты: Сұрақтарға анасы мен баласы қатар жауап беріп отырады.
1.Анаң қандай түсті киімдерді ұнатады?
2. Жақсы көретін тағамы не?
3.Ұнататын гүлі қандай?
47.Анаң қандай иіс суды ұнатады?
5.Бос кезде немен шұғылданғанды ұнатады?
6.Ұнатпайтын ісі қандай?
7.Ұнататын әншісі кім?
8.Сырғасы қандай неден жасалған?
9.Анаңның көзінің түсі қандай?
10.Анаңның көретін телесериалдары?
11.Анаңның еркелеткенде жиі айтатын сөзі қандай?

№1 Бір өзіңнен бастап өмір жолдарын
Жүрегіңе жүрегімді жалғадым
Өзің мына сыйға берген өмірде
Ақ сүтіңді ақтап өту арманым – деген жыр жолдарымен бүгінгі тәрбие сағатымызды аяқтаймыз.