Әркімнің де өлеңге бар таласы... (Мұқағали шығармашылығына саяхат сабақ)

Әркімнің де өлеңге бар таласы...
(Мұқағали шығармашылығына саяхат сабақ)

10 - сынып Қазақ әдебиеті

Сабақтың тақырыбы: «Әркімнің де өлеңге бар таласы»
(М. Мақатаевтың шығармашылығына саяхат)
Сабақтың мақсаты: Білімділік: оқушылардың мәнерлеп оқу, жаттау, өлең табиғатын түсіну дағдысын қалыптастыру, ақын шығармаларының идеялық мазмұны негізінде өлең құрауға, талдай білу жолдарына үйрету.
Тәрбиелік: оқушыларды сөз өнерін бағалай білуге тәрбиелеу, қабілет - икемділік қасиеттерге баулу
Дамытушылық: оқушылардың ойлау, сөйлеу, өз ой - пікірін еркін жеткізе білуін дамыту, эстетикалық талғамы жоғары өлең шығаруға, көркем сөйлеуге үйрету
Сабақтың түрі: саяхат сабақ, тіл ұстарту элементтері аралас сабақ.
Әдіс тәсілдері: жеке және топтық жұмыс, СТО стратегиялары - ой - қозғау, болжау, мағынаны ажырату.
Көрнекілігі: қанатты сөздер, интерактивті тақта, электронды оқулық
Пәнаралық байланыс: музыка, қазақ тілі, бейнелеу өнері

Сабақтың барысы:
І. Ұйымдастыру (оқушыларды үш топқа бөлу)
ІІ. «Қызығушылығын ояту» Үнтаспа арқылы М. Мақатаевтың «Ей, өлең!» өлеңін таныстыру
Ей, өлең, маған тиген еншім едің,
Бой жазайын, қасыма келші менің
Менің саған шамалы жақсылығым
Сен де маған, әрине, көншімедің.
Балалар үнсіз тыңдап отырады. Оқушыларға ой - қозғау сұрақтарын қою
1. Көз алдарыңызға қандай көрініс елестеді?
2. Кімге қандай ой келді?
3. Өлең, ақын деген түсінікті қалай түсіндірер едің?

ІІІ. Негізгі тақырыпқа арналған дәйексөз
«Қазақтың тілін білген адам Мұқағали поэзиясын сүймеуі мүмкін емес. Мұқағали поэзиясын сүйген адам еліне, жеріне ие, табиғатқа жанашыр бола алады»
(К. Ахметова)