Қоянмен таныстыру

Білім беру саласы: "Қатынас"
Ұйымдастырылған оқу іс - әрекеті: Тіл дамыту
Тақырыбы: Қоянмен таныстыру
Мақсаты: Балаларды қоянмен таныстыра отырып, қоян туралы түсініктерін қалыптастыру, сурет арқылы оның дене мүшелерімен таныстыру. 1 - 2 сандары туралы қарапайым білімдерін анықтау. Балалардың зейінін, есте сақтау қабілеттерін жетілдіру.
Әдіс - тәсілі: Түсіндіру, сұрақ - жауап, қимылды әуен, тосын сәт, мадақтау
Көрнекілігі: Қасқыр мен қоян кейіпкерлері, суретті карточкалар, сәбіз, тордағы тірі қоян, теледидар
Пәнаралық байланыс: Тіл дамыту, ән - әуез
- Балалар қараңдаршы, бізге бүгін қаншама қонақтар келіп отыр, амандасайықшы!
- Сәлеметсіздер ме!
Балаларды терезеге жақын апарып бақылату.
- Қазір жылдың қай мезгілі?
- Қыс мезгілі
- Далада не жауған?
- Қар жауған
- Қардың түсі қандай?
- Қардың түсі ақ
- Тағы не көріп тұрсыңдар?
- Ағаштар, құстар
- Ия, бұл құстар қарғалар екен.
- Қарға қайтіп дыбыс шығарады?
- Қарқ - қарқ
Осы кезде қоянды қасқыр қуып топқа кіріп келеді. Қоян балалардың артына жасырынып қалады.
- Қасқыр, бұл «Бөбектер» тобы, сен мұнда не істеп жүрсің?
- Мен қояндарды ұнатамын, мен оны жеймін. (Тілімен ернін жалайды)
- Балалар, біз қасқырға қоянды жегіземіз бе?
- Жоқ, жоқ. Қане қасқыр, табаныңды жалтырат!
Балалар аяқтарын тарсылдатып қасқырды қуып жібереді.
- Қоян, сен тығылма бері шыға ғой, біздің балалар қасқырды қуып жіберді. Балалар, бұл кім?
- Бұл қоян
- Ия, бұл бізге жаңа жылдық шыршадан келген қоян. Қоянды ортамызға алып, жақынырақ танысайық.
Сурет арқылы әңгімелеу.
- Суреттегі қоянның түсі қандай?
- Түсі ақ.
- Ия, қыста қоянның түсі, қардың түсіндей ақ болады. Қоян бізге көзімен қарап тұр. Қане, қоянның көзін санайықшы.
- Бір көз, екі көз.
- Мұрны қайсы кім көрсетеді? (Балалар көрсетеді)
- Құлағы қандай?
- Құлағы ұзын.
- Құлағын санайықшы
- Бір құлақ, екі құлақ
- Аяқтары қайда? (Балалар көрсетіп, санайды)
- Орнымыздан тұрып, қоян қалай секіреді екен көрсетейікші.
Балалар қоян болып секіреді.
- Енді, сендер тірі қоян көргілерің келе ме?
- Ия, көргіміз келеді.
- Ендеше, көздеріңді екі қолдарыңмен басып жұма қойыңдар.
Торға қамалған қоянды шығарады
- Ал, енді көздеріңді аша қойыңдар. Бұл кәдімгі орманда жүретін қоян. Оның жүні үлпілдек, жұмсақ болады. (Балалар сипалап көреді)
- Қоян не жейді?
- Сәбіз жейді.
- Ия, қоянның сүйікті тағамы сәбіз, қырыққабат, көк шөп және су ішеді. Қанекей, қоянға сәбіз берейік. (Балалар қоянға сәбіз береді)
- Енді, қоянға арналған әнімізді айтып берейік (Балалар ән айтады)
- Жарайсыңдар, балалар! Бүгін сендер қоянды қасқырдан аман алып қалдыңдар. Тордағы қоянмен танысып, оған арнап ән де айтып бердік. Осы қызықты сәтімізді теледидардан мультфильм көрумен жалғастырайық.
«Қап, бәлем» мультфильмі.
Күтілетін нәтиже:
Білуі: Балалар қоянның дене мүшелерімен танысып, атай біледі.
Меңгеруі: Дене мүшелерін санау арқылы көрсетеді, салыстырмалы түрде ажырата білуді меңгереді
Жасай алуы: Қоянның қимылын көрсетіп жасай алады.