Әдістемелік нұсқау хат 2024-2025 оқу жылына арналған балабақшаға

2024 - 2025 оқу жылының негізгі ерекшеліктері
Жаңа оқу жылында Қазақстан Республикасының заңнамасына, Мемлекет басшысының және Үкіметтің тапсырмаларына, сондай - ақ Қазақстан Республикасында мектепке дейінгі, орта, техникалық және кәсіптік білім беруді дамытудың 2023 - 2029 жылдарға арналған жаңартылған тұжырымдамасының негізгі ережелеріне (бұдан әрі – Тұжырымдама), білім беру саласының стратегиялық және бағдарламалық құжаттарына сәйкес мектепке дейінгі тәрбие мен оқыту жүйесінде (бұдан әрі – МДТО) жұмыстың мынадай бағыттары өзектендірілді:
 жаңартылған Қағидаларға сәйкес мектепке дейінгі тәрбие мен оқыту саласында қызметтің басталғаны немесе тоқтатылғаны туралы хабарлама;
 МДҰ мен жалпы білім беретін мектептерде, лицейлер мен гимназияларда мектепалды сыныптарда балалардың қауіпсіз болуын қамтамасыз ету;
 балалармен, ата - аналармен және айналасындағылармен қарым - қатынас жасауда педагогикалық әдеп нормаларын қатаң сақтау, зорлық - зомбылықтың, буллингтің және балалардың құқықтарын бұзудың кез келген түрін болдырмау;
 Мектепке дейінгі білім беру саласында мемлекеттік қызметтер көрсетудің жаңартылған қағидаларына сәйкес МДҰ - ға кезектілік пен жолдама беруді есепке алудың Бірыңғай базасы арқылы мемлекеттік қызметтерді іске асыру;
 отбасы мен тәрбиеленушілерді әлеуметтiк - педагогикалық қолдау мақсатында мектепке дейінгі тәрбиемен және оқытумен қамтылмаған
балалардың ата - аналары үшін білім беру ұйымдарында консультациялық пункттердің қызметін кеңейту;
 «Балақайлар мектебі» бағдарламасы бойынша қысқа мерзімді мектепалды даярлықты ұйымдастыру;
 бастауыш сынып мұғалімі жеке оқыту траекториясын анықтау үшін мектепке дейінгі тәрбие мен оқыту, мектепалды даярлық бағдарламаларын меңгеру қорытындысы бойынша мектепалды жастағы баланың Жеке даму картасын қалыптастыру;
 өңірлік ерекшеліктер мен климаттық өзгерістерді ескере отырып, экологиялық білім беру сапасы мен тәрбиеленушілердің экологиялық мәдениетін арттыру;
 ұлттық мәдениетке қызығушылықты арттыру, қазақ тілін меңгеруге ынталандыру;
 педагогтердің біліктілікті арттыру курстарынан өткізу арқылы мектеп жасына дейінгі балаларға қазақ тілін үйрету бойынша «Тілге бойлау» пилоттық жобасын іске асыру;
 МДҰ мен ата - аналар қауымдастығының ықпалдастығын нығайту, «Әжелер мектебі», «Әкелер мектебі», «Жас аналар мектебі» әлеуметтік институтын дамыту;
 МДҰ қызметінің басым бағытын айқындау, Даму бағдарламасын әзірлеу;
 МДҰ - ның сапаны бағалау өлшемшарттарына сәйкестігін 50% – ға дейін ұлғайту (2023 ж. - 25%);
 жаңа жүйе бойынша МДҰ педагогтерін аттестаттаудан өткізу;
 тәрбиеленушілердің білім алудағы жетістіктері негізінде педагогтің қызметін бағалау;
 «Ұстаз Ұлттық платформасы» арқылы «Педагог бейіні» цифрлық модулінде кәсіби қызметтің нәтижелерін жинақтау;
 «жоғары», «бірінші», «екінші» біліктілік санаты бар педагогтер
2024 жылдың соңына дейін жаңа жүйе бойынша аттестаттаудан міндетті түрде өтуі;
 тәрбиелеу - білім беру процесіне енгізу үшін МДҰ педагогтерінің озық тәжірибесінің электрондық Банкін қалыптастыру;
 Құзыреттілік орталықтарында үздік педагогикалық тәжірибе алмасу және тарату;
 Қазақстан Республикасы Оқу - ағарту министрлігі Балаларды ерте дамыту институтының (бұдан әрі – Институт) сайтында4 виртуалды әдістемелік кабинет арқылы педагогтер практикасын және ата - аналарды қолдау;
 «Білім берудегі өзгерістердің 1000 көшбасшысы» бағдарламасы аясында МДҰ басшыларының республикалық кадрлық резервіне 50 үміткерді іріктеу.

​Әдістемелік нұсқау хат 2024-2025 жыл жүктеп алу​​​