Күз береке - күз мереке

Тақырыбы: «Күз береке - күз мереке»
Мақсаты: Күз мезгілі туралы білімдерін бекіту. Күз мезгілі туралы білімдерін тиянақтау. Күзгі табиғат ерекшеліктерін таныстыра отырып, көтеріңкі көңіл - күй сыйлау. Шығармашылық қабілеттерін дамыту, ой - өрістерін кеңейту, табиғатқа деген сүйіспеншіліктерін қамқорлық сезімдерге тәрбиелеу.
Балалар әуенмен залға кіреді.
Жүргізуші: Қарсы алайық бәріміз,
Жасымыз бен кәріміз.
Қырдан кепті қыдырып,
Алтын күз бізге нұр төгіп.

Тілегім аман болсын ел іргесі,
Алтын күз қайта келді берекесі.
Молшылықтың жаршысы бола білді,
Алтын күз - ырыс, береке, бірлік ала келді.
Ән: «Күз жомарт»
Ойын: «Күз ерекшеліктері»
Балаларға табиғат құбылыстары мен күз мезгіліне байланысты өзгерістер айтылады. Күз мезгілі туралы болса қолдарын шапалақтайды, ал басқа жыл мезгіліне байланысты құбылыс болса аяқ тарын топылдатады.
Мыс: Күн суыта бастайды, аспанды бұлт қаптайды жапырақтар сарғаяды, жаңбыр жиі жауады, егін орады, жемістер мен көкөністер піседі (Күз мезгіліне байланысты). Күн қатты ыстық, адамдар жеңіл киінеді, жапырақтар жап - жасыл, балалар көбелекті қуады, қар ериді(жыл мезгіліне байланысты).
Жүргізуші: Бүгін мейрам бүгін той
Қуаныш күн біліп қой
Күзгі бақтай сыңғырлап
Алақанды қатты - қатты соғып қой.
- Балалар, кәне бәріміз бірге қайталайық.
Келші, келші Алтын күз,
Келші, келші жарқын күз.
Мерекені жалғастырып,
Ойнап – күлші Алтын күз.
Залға қолында сыйлығы бар күз ханшайымы кіреді.
Күз: Сәлеметсіздер ме, менің достарым! Ал менің кім екенімді білгілерің келсе, мен сендерге өзім туралы жұмбақ жасырайын.
Жұмбақ: Жел тынымсыз гуілдеп
Болып кетті тым бұзық
Шуылдайды тал - терек
Жапырағын жұлғызып
Бұлттар төніп, жерге төніп
Дымқыл тұман басады,
Шөп сарғайып, өңі тайып
Дала сұры қашады
Ойнай алмай, денең мұздап тоңады
Айтыңдаршы, бөбектерім бұл қай кезде болады?
Күз: Дұрыс айтасыңдар, мен алтын күз боламын.
Жүргізуші: Өнерлі ғой балалар
Көңілдері пәк жайсаң
Тақпақ айтып берейік
Алтын күзге біз арнап
Балалардың тақпақтары:
«Күз»: Балалар мен сендермен ойын ойнағым келіп тұр. Ойнаймыз ба?
Ойын: «Көкөністі кім тез жинайды?»
Ойын шарты: Екі жақтан 3 баладан шыға қойсын. 1 - бала көкөністі егеді, екіншісі суарады, үшіншісі себетке жинайды. Ойынды екі рет қайталату.
Жүргізуші: Ән салыңдар, күліңдер
Жайнап гүлдей жүріңдер
Күздің тойын тойлайық,
Би билейік ойнайық.
Кездескен соң күзімен
Бұтағынан үзілді,
Ақ жапырақ сары алтын
Айналаның бәрі алтын
Би: «Жапырақтар» Күз ханшайымымен бірге.
Жүргізуші: Күзім - ау, күзім - ау
Мінезің бұзық ау
Жаңбырың сіркіреп
Тұрғаның қызық - ау
Жеке ән: «Жау, жау жаңбыр»
Әуенмен залға түлкі кіреді
Түлкі: Сәлеметсіңдер ме, достарым сендер не істеп жатырсыңдар?
Жүргізуші: Сәлеметсіз бе, түлкі біз «Алтын күз» тойлап жатырмыз.
Түлкі: Сендерге күз неге керек?
Жүргізуші: Енді жаз мезгілінен кейін күз мезгілі келмей ме?
Түлкі: Күздің келгеніне неге қуанасыңдар? Күн салқын, жапырақтар түсіп жатыр, жаңбыр жауып тұр. Осыған қуану керек пе?
Жүргізуші: Сен олай айтпа, әр жыл мезгілінің өзінің табиғат ерекшелігі бар. Әр жыл мезгілі өзінше әдемі. Күзде табиғат ерекше түстерге боялады.
Түлкі: Күз әдемі, оның несі бар? Күзсіз өмір сүре аламыз.
Жүргізуші: Сенікі түлкі дұрыс емес. Күз мезгіліне байланысты біздің балалардың қазақша, орысша, ағылшын тіліндегі тақпақтарын тыңдап көрші.
Балалардың тақпақтары
Би: «Саңырауқұлақтар биі». (ер балалардың орындауында)
Түлкі: ой балалар, сендер өнерлі екенсіңдер, ал мына күз мезгілі сыйлықтарымен не істейсіңдер?
Жүргізуші: Бұлардың адам денсаулығына маңызы зор дәрумендер бар. Дәрумендер денсаулыққа пайдалы. Біз оларды жейміз.
Түлкі: себетке үңіле қарап, ал мыналарды қалай айырасыңдар, қайсысы жеміс, қайсысы көкөніс.
Жүргізуші: біздің балалар айырып бере алады.
Ойын: «Айырып сал»
Түлкі: Ал жақсы өте жақсы біледі екенсіңдер, ал жаңбыр жауғанда несіне қуанасыңдар?
Жүргізуші: Жаңбыр жауғанда табиғат ана қуанады, ал біз жаңбырды бақылауды жақсы көреміз. Ал жаңбырдан біз қолшатырмен қорғанамыз.
Түлкі: Қол шатыр дегеніміз не?
Жүргізуші: ендеше қыздарымыздың орындауында «қолшатыр биін» тамашала, сонда түсінесің.
Би: «Қолшатыр биі»
Түлкі: Енді түсіндім. Балалар. Мен бір ойын ойлап таптым, соны ойнап көреміз бе?
Ойын: «Күн мен жаңбыр»
Ойынның жүру барысы: Үш түрлі түсті қолшатыр болады. «Жаңбыр» жауған кезде жүргізуші қолшатырдың түсін айтады, соның астына балалар тығылу керек. Ойын қайталану барысында түстерді алмастырып айтады.
Түлкі: маған сендермен ойнаған ұнады. Қолшатырларың әдемі екен.
Күз: Сыйлыққа саған бір қолшатыр берейік, аласың ба?
Түлкі: Ой, рахмет, аламын. Өзіне ұнаған қолшатырды алады.
Жүргізуші: Алтын күз, түлкі сіздерге үлкен рахмет! Біздің балалардың көңілдерін бір көтеріп тастадыңдар.
Күз: Достарым, бүгін сендер «Алтын күз» мерекесін тамашаладыңдар. Көңіл көтеріп, күзгі байлығымызды тердік. Еңбектеріңнің жемісін көріңдер. Мен сендерге құр келмей, мына жеміске толы себеттерді сендерге ала келгем. Балалар, менің басқа балабақша бүлдіршіндеріне баратын уақытым болды. Мен енді кетейін, сау болып тұрыңдар! Келесі кездескенше аманшылық болсын!
Сау болыңдар!
Жүргізуші: Күз ханшайымының сыйы - жемістерден дәм тататын кез келген сияқты, тобымызға баруға жиналайық.
Құрметті қонақтар, ата - аналар бүгінгі «Күз береке - күз мереке» - атты ертеңгілігімізді аяқтай отырып, күз берекелі, астықты болсын демекпіз. Күзге айтарымыз берер сыйын жылдан - жылға көп болсын елде тыныштық болсын дейміз.
«Берекелі бақ дәулет,
Арта түссін тойланып
Сау болыңдар қонақтар,
Келгенше жыл айналып».

Атырау қаласының
МКҚК №29 «Нұрсая» бөбекжай - балабақшасының тәрбиешісі
Аманиязова Заря Сисенғалиқызы