Сөз мәнісін айыра біл - Мұзафар Әлімбаев

Мұзафар Әлімбаев
Ана тіліне тағзым кітабынан

Сөз мәнісін айыра біл

Ескек ескен Есенкелді ағамыз,
Асау Ертіс айдынында ағамыз.

***
Ауыр екен қап,
Әттеген - ай, қап!

***
Мылтықтың оғы – қорғасын,
Қасқырдан малды қорғасын.

***
Қолындағы керней ме,
Керней бізге сөйлей ме?
Үрлегенде аузыңмен
Ішін ауа керней ме?

***
Жолдасыңмен келіс те,
Жұмысыңды кел, істе!

***
Асқосшы!
Бәйгеге сен де ат қосшы!

***
Абайламай, аяғына қарамай,
Табаныңа жағып алдың қара май.

***
Көкжиектің шетіне
Көтеріліп ай шықты.
Сырмақтардың бетінде
Еске салар айшықты.

***
«Алмаймын, - деп, - бақырды!»
Алтай біздің бақырды.

***
«Ерлігі елден ерек»
Жас кезде біз де ер ек», -
Деседі ақсақалдар,
Желкілдеп ақ сақалдар.

***
Қашан? Қайда? Қай мықты?
Қас дұшпаннан қаймықты?!