Үй құстары

Үй құстары
Білім беру саласы: «Коммуникация»
Бөлімі: Сөйлеуді дамыту.
Білімділік міндеті: Балалардың үй құстары туралы білімдерін кеңейту, тауық оның пайдасы туралы түсініктерін молайту.
Дамытушылық міндеті: балаларға осы түсініктерді бере отырып, ақыл – ойларын дамыту, байланыстыра сөйлей білуге үйрету.
Тәрбиелік міндеті: үй құстарына қамқор болуға, оларды күте білуге, еңбек сүйгіштікке тәрбиелеу.
Көрнекіліктер: үй құстарының суреттері, дидактикалық материалдар, слайд көрсету.
Әдіс - тәсілдері: түсіндіру, сұрақ - жауап, әңгімелесу.
Қостілділік компоненті: тауық - курица, әтеш - петух, шөже - цыпленок

Мотивациялық - қозғаушылық
Шаттық шеңбері:
Алақанды ашайық,
Күннің нұрын салайық,
Таза ауаны жұтайық,
Жүрек жылуымызды,
Қонақтарға сыйлайық.
- Жақсы балалар, енді орындарыңа жайғаса қойыңдар.

Ұйымдастырушылық - ізденістік
- Балалар, біз қандай құстарды білеміз?
- Құстар қандай болып бөлінеді?( Үй құстары және дала құстары болып екіге бөлінеді).

- Үй құстарына қандай құстар жатады? (қаз, үйрек, тауық, қораз).
- Дала құстарына ше?(торғай, қарлығаш, қарға, тоқылдақ, көкек).
- Дұрыс айтасыңдар.
- Ал бұл құстардың айырмашылығы, балалар, үй құстары үйде бағылады, адамның көмегін қажет етеді. Дала құстары болса, өз бетінше өмір сүре алады, өз тамақтарын өздері аулап өмір сүреді.
- Балалар, үй құстары бір - бірімен қалай амандасатынын білесіңдер ме? құстар сөйлей білмесе де өздеріне тән дыбыс шығарып, өзара бір бірімен амандасып, адамдар сияқты қарым қатынаста болып, бірін - бір жақсы түсінеді және сезінеді екен.

Дидактикалы ойын:
Құстардың үнін балаларға тыңдата отырып, қай құстардың дауысы екенін сұрау.
Кәне, бір - бірімізбен үй құстары сияқты амандасайық. (Балалар үй құстарының дыбыстарына салып, бастарын изеп амандасады.)
- Жарайсыңдар, балалар!
- Енді балалар құстардың дене мүшесін атап өтейік.(денесі, басы, тұмсығы. қанаты, аяғы.)
- Өте дұрыс айтасыңдар!
- Тұмсығымен шоқиды, қанатын қағып ұшады.

Ғажайып сәт:
Топқа балапандарын жоғалтып алған тауық келеді.( Балалар қуана қарсы алады)
Ол балаларға өзінің шөжелерін жоғалтып алғаны туралы айтып мұңаяды және шөжелерін тауып беруге көмектесулерін сұрайды.
Тәрбиеші:
- Балалар, тауыққа балапандарын табуға көмектесеміз бе?(әрине, көмектесеміз.)

Сергіту сәті:
«Балапандар» биі. Тауықпен бірге балалар билейді (балалар қуанады).
Жұмбақ жасыру:
Күн бата қонақтап қалғыған,
Таң ата жерден жем аңдыған. (Тауық)
Ақ сарайын талқандап,
Шықты біреу талтаңдап. (балапан)
- Ал енді, балалар, тауыққа шөжелерін табуға көмектесейік.
Тапқан балапандарды тауықтың қасына қою.
Тәжірибелік жұмыс.
Ыдыста аралас болған тары мен бұршақты бір – бірінен ажыратып шөжелерге тарыны беру.

Рефлекциялық - түзетушілік
- Балалар сонымен біз бүгін қандай тақырыпта танысып, әңгімелестік? (Үй құстары)
- Үй құстарына қандай құстар жатады? (Тауық, үйрек, қораз, қаз).
- Дала құстарына ше? (қарға, сауысқан, тоқылдақ, көкек, тоғай).
- Біз неге көмектестік? (біз тауыққа балапандарын тауып беруге көмектестік).

Күтілетін нәтиже:
Біледі: Үй құстарымен дала құстарын ажырата білуді;
Игереді: Үй құстарының атауларын және олардың қалай дауыстайтынын;
Меңгереді: Құстарға қамқор бола білуді;

Шығыс Қазақстан облысы, Катонқарағай ауданы,
Солоновка ауылы, «Балауса» балабақшасының тәрбиешісі
Мамиева Салтанат Кожаевна