Сусындар. Қандай?

Сабақтың тақырыбы: "Сусындар. Қандай?" (слайд)

Орыс мектебінің 2 - сынып оқушыларына арналған сабақ жоспары.
Сабақтың тақырыбы: Сусындар. Қандай?
Сабақтың мақсаты:
Білімділік: азық – түліктер тақырыбы бойынша алған білімдерін пысықтау, алдыңғы сабақтарда меңгерген сөздерді әр түрлі жағдайда қолдана білуге үйрету, мәнерлеп оқу, ойды жүйелеп айту дағдыларын қалыптастыру, қазақ тіліне тән дыбыстардың дұрыс айтылып – жазылуына назар аударту;
Дамытушылық: жаңа сөздермен оқушылардың сөздік қорын молайту, өз беттерімен сөйлем құрауға үйрету, жазбаша тапсырмаларды дұрыс, сауатты орындау дағдыларын, оқушылардың дүниетанымын, ауызекі сөйлеу тілдерін дамыту;
Тәрбиелік: оқушылардың қазақ тілі пәніне деген қызығушылығын арттыру, мәдениеттілікке тәрбиелеу. Нанның қасиеті туралы тәрбиелік мәні зор әңгіме ұйымдастыру.
Сабақтың түрі: оқушылардың білімдерін ойын элементтері арқылы қорыту, жүйелеу сабағы.
Сабақтың әдіс – тәсілдері: сұрақ – жауап, дидактикалық ойындар, диалог, жазбаша, ауызша, жеке, жұптық жұмыстар, суретпен жұмыс
Көрнекілігі: интерактивті тақта, суреттер, тапсырмалар, слайдтар.

Сабақтың барысы:
I. Ұйымдастыру кезеңі:
1. Амандасу, түгендеу, сабаққа дайындықтарын тексеру.
2. Тіл дамыту сұрақтары: Айтылым.
- Қазір жылдың қай мезгілі?
- Қазір жылдың қыс мезгілі.
- Қыс айларын ата.
- Қыс айлары: желтоқсан, қаңтар, ақпан.
- Қазір қай ай?
- Қазір қаңтар айы.
- Қыста ауа райы қандай болады?
- Қыста ауа райы суық болады, қар жауады, аяз болады...
- Қыста адамдар қалай киінеді?
- Қыста адамдар жылы киінеді.

3. Суретпен жұмыс: Тақтада қыс тақырыбына плакат ілінген. « Қыс» тақырыбын 1 оқушыға әңгімелету. Тыңдалым. Айтылым.
- Қыста қандай мейрамдар бар?
- Дұрыс. Тәуелсіздік күні мен жаңа жыл мейрамы бар.
- Жаңа жылда адамдар қайда барады, не алады?
- Дұрыс. Дүкенге барады, азық – түлік алады.

II. Үй тапсырмасын тексеру: Тыңдалым. Айтылым.
1. Жаңа сөздер: азық – түліктерге қатысты сөздерді « Мұғалім мен оқушы» ойынын ойнату арқылы тексеру. Яғни, тақтаға мұғалім рөлінде оқушы шығып, оқушылармен диалог жүргізеді:
- Мынау не?
- Мынау - шұжық.
- Мынау нан ба?
- Жоқ, бұл - ірімшік.
- Нан қандай?
- Нан - жұмсақ.
- Кәмпит қандай?
- Кәмпит - тәтті.
2. Мақал - мәтел, тақпақ айту: Айтылым.
- Балалар, ең басты тағам қандай?
- Дұрыс, ең басты тағам – нан.
- Қандай өлең, мақалдар білеміз?
« Ас атасы – нан», « Дастарқанда нан болмаса, Тамақта мән болмас»
,, Нан иісі’’ - тақпақты жатқа айту.
Сергіту сәті: Нанды шашпа,
Аяғыңмен баспа.
Жерде жатса көтеріп,
Торғайларға таста.
- Нанды шашуға бола ма?
- Аяқпен басуға бола ма?

3. «Азық – түлік»дүкенінде – диалог. Тыңдалым. Айтылым.
Екі – үш оқушыдан шығарып, «Дүкенде» ойынын ойнату. Сатушы мен сатып алушы болып рөлдік ойын көрсету.
- Қыз өз кезегін әжеге берді, ол дұрыс істеді ме?
- Ондай оқушыны қалай атаймыз?
- Азық – түліктер біздің организмге қаншалықты қажет болса, біз тағы несіз өмір сүре алмаймыз?
- Дұрыс. Сусыз.
- Суды ішеміз, тамақ пісіреміз, жуынамыз...

III. Жаңа сабақ: Сусындар. Қандай? ( Сабақтың тақырыбы мен мақсатын айту)
1. Жаңа сөздер: Тыңдалым. Айтылым. Жазылым.
Сусындар – Напитки
Шырын – Сок
Жылы – Теплый
Суық – Холодный
Ыстық – Горячий
Тәтті – Сладкий
Жұмсақ – Мягкий
Дәмді – Вкусный
Тоңазытқыш – Холодильник
1. Сөздерді оқу, оқушыларға оқыту
2. Сөздерді буынға бөлу
Су - сын - дар, шы - рын, жы - лы, су - ық, ыс - тық, тәт - ті, жұм - сақ, дәм - ді, то - ңа - зыт - қыш ( қандай?
3. Сөздермен сөз тіркестерін, сөйлемдер құрату
Жылы сүт, суық су, ыстық шай...
Бүгін күн суық. Мен шырын сатып алдым.
2. Мәтінмен жұмыс: Тыңдалым. Оқылым.
Мынау – азық - түлік дүкені. Дүкен кең, таза, жарық. Дүкенде нан, май, қант, шұжық, ірімшік сатылады. Сусындар бөлімінде шырын, су, сүт, айран сатылады. Салқын сусындар тоңазытқышта тұр.

3. Суретпен жұмыс: Сұрақ – жауап:
- Бұл не?
- Бұл - дүкен.
- Бұл қандай дүкен?
- Бұл - азық - түлік дүкені.
- Дүкен қандай?
- Дүкен - үлкен, жарық.
- Дүкенде нелер сатылады?
- Дүкенде азық - түліктер, сусындар сатылады.
- Қандай сусындар сатылады?
Дүкенде су, шырын, айран сатылады.
- Сусындар қайда тұр?
- Сусындар тоңазытқышта тұр.
Сергіту сәті:
Дүкенге біз барамыз,
Қолға сөмке аламыз.
Кәмпит, айран, шырынды
Алып үйге қайтамыз.

4. Тапсырма: Суретте берілгендерді топтап айтыңдар. Айтылым.
5. Дәптермен жұмыс: 137 – бет, 4 – тапсырма. Жазылым.
6. Тірек кесте: Қандай? сұрағына сөздерді атап, тірек кестені толтыру.

7. Сабақты «Пальма» ойынын ойнату арқылы бекіту:
- Мынау не?
- Мынау маймыл.
- Маймыл қайда отыр?
- Маймыл нені жақсы көреді?
- Маймылдың қолында не бар?
- Қолында неше банан бар?
- Маймылға көмектесеміз бе?
Мына банандарда тапсырма жазылған. Сол тапсырмаларды орындасақ, банандарды пальмаға ілеміз.
- Сусындар қайда сатылады?
- Шай қандай болады?
- Сладкий сөзінің аудармасы?
- Жұмсақ сөзінің аудармасы қалай болады?
- Сүттің түсі қандай?
- Кәмпиттің дәмі қандай болады?

8. Үйге тапсырма: жаңа сөздерді жаттау, мәтіннің мазмұнын айту.
Бағалау