Әйелдің ақылдысы – сенде, Әдемісі – құрдасыңда болғаны дұрыс.

Әйел туралы Қадыр ағамыздың айтқандары:

Әйел аттың ерінен биік,
Өз ерінен аласа болуы керек.

Әйелдің ақылдысы – сенде,
Әдемісі – құрдасыңда болғаны дұрыс.

Әйел күйеуінің өлгенін тілемейді,
Өзінен кейін тірі қалғанын да қаламайды.

Ердің еңсесі биік,
Қыздың өкшесі биік.

Өзі туралы үлкен ойлайтын қыз
Үйінде отырып қартаяды.

Соқыр еркек пен мылқау әйелдің үйінде ұрыс болмайды.

Еркек – көрсеқызар,
Әйел – қызғаншақ,
Қашан табысар екенбіз?

Жуас жігіт әйел таппайды,

Әйел оны табады.
Байсыз әйел – байлаусыз қашар.

Ашулы әйел айдаһардан да бетер.

Күйеу сабайтындай күші болса,
Әйел қулыққа бармас еді.

Әйелдің сүйкімділігі – қылығында,
Күш қуаты қулығында.

Ерте тұратын еріншек жоқ,
Байын қызғанбайтын келіншек жоқ.

Қыздың қызыл юбка кигені –
Күйеуге дайын болғаны.

Кедейде тоқал болмайды.
Қыз таңдама, ене таңда!

Әйел тілі ащы,
Еркектің жұдырығы жаман.

Жақсы әйел өз үйіне әрі ханым әрі күң.

Екі әйел бар үйде еден жуылмайды.

Әйелсіз күн көру мүмкін емес,
Бірақ күнің күн емес!

Күнәсіз әйелді қорлама,
Қарғысына ұшырайсың.

Қазымыр қатынның байы ерте қартаяды.

Бір әйелдің көтерген жүгін
Екі есек те көтере алмайды.

Күйеуі соқыр болса,
Салақ қатынның жаны тыныш.

Әйелді ғашық болып ал,
Көзіңді ашып тұрып ал.

Бетпақ әйел – байының байы.

Тоқал үйге кіріп келе жатқанда,
Тыныштық үйден шығып бара жатады.

Әйелдер қызық: мықты жігіттің бойынан осалдық;
осал жігіттің бойынан мықтылық іздейді.