Бала ойы

Ескен Елубаевтың өлеңі

Мезгіл келіп жеткенде
Сыбызғылы, сырнайлы,
Күн мейірін төккенде,
Бозторғайлар жырлайды.
Ақ жаңбырға шомылып,
Туған жердің алабы,
Қызғалдаққа көміліп,
Көздің жауын алады.
Жайнап тұрған түз жаққа,
Көзім тоймай қараймын
Әсемдіктің ұзаққа
Созылуын қалаймын.
Көкейдегі тілегім:
Шөбін шаппай тұрғанда,
Жайып далам кілемін,
Салтанатын құрғанда,
Шартараптан келімді
Көп кісілер келсейші.
Менің туған жерімді
Осы кезде көрсейші.

Маңғыстау облысы, Бейнеу ауданы,
Боранқұл орта мектебі
Маханұлы Қуаныш
Мұғалімі: Мендигазиева Гүлжихан

Ескен Елубаевтың басқа өлеңдері