Үлкеннің жолын кеспе

Салт - дәстүр сөйлейді
Үлкеннің жолын кеспе
Бірде Әзірет Әлі жолда келе жатқан бір шалдың алдынан менсінбей кесіп өтеді. Мұны байқап қалған Мұхамбет пайғамбар:
– Әлижан, қарттың жолын неге кестің? – деп сұрайды.
– Ол кісі мұсылман емес қой. Ондай құрметке лайық көрмедім, – дейді Әли.
Пайғамбар:
– Әли, есіңде болсын! Үлкен кісіге құрметі жоқ жанды Тәңірім сүймейді. Ол мұсылман болмаса да, сақалының ақтығы сенің бәсіңнен артық. Барып, одан кешірім сұра! – дейді. Әзірет Әлі қайтып келіп, қариядан кешірім сұрайды. Ол:
– Неге кешірім сұрайсың? – деп қайран қалады.
– Мен тәкаппарлықпен жолыңызды кесіп өттім, сізді менсінбедім. Сол үшін кешіріңіз, – дейді. Сол сәтте әлгі қария Қызыр бабаға айналып шыға келеді.
– Әй, Әлижан, мен сені сынап едім. Егер артыңа қайырылмай кете бергеніңде, тәкаппарлық сені тозаққа түсірер еді. Құдай бір апаттан аман сақтапты. Өркенің өссін! – деп, батасын береді. Әли сыннан аман өткеніне шүкірлік айтып, пайғамбарға келеді.
Расул:
– Әй, Әли мен саған «Ол қарттың сенен бәсі артық» деп айтып едім ғой. Бұдан былай үлкеннің алдын кеспе! – дейді. Осыдан бастап, пайғамбардың бұл сөзі қауымға тез таралып, келе - келе көркем сүндеттердің біріне айналыпты.

әзірлеген
Бегімхан КЕРІМХАНҰЛЫ
М. Әуезов атындағы ЖОББ мектептің қазақ тілі мен әдебиеті мұғалімі
Павлодар қаласы
Қазақстан Журналистер Одағының мүшесі