Кешірім

КЕШІРІМ
Тағдырыңның жапқаныңша есігін,
Өкпелеуден тұрмау керек шешімің.
Айналаңа өту үшін тік қарап,
Бұл өмірде керек екен кешірім.
Кейде біреу тыжырайтып шекесін,
Әжуалап айтса - дағы кекесін.
Кешір оны, шамырқанба, шапшыма,
Сонда ғана мұратыңа жетесің.
Кешірім ет аяғыңнан шалғанда,
Жылы қара жұмбағы көп жалғанға.
Өзің кейде жасай қалсаң қателік,
"КЕШІР"- деген сөзді айтуға арланба.
Талай пенде кектескеннен сорлаған,
Өшпендік пен өз тағдырын торлаған,
Мың кешірім сұрап тұрып, Тәңірден,
Сен біреуді кешірмесең сол жаман.
Өткен күннің сабыры екен - КЕШІРІМ,
Келер күннің рахымы екен - КЕШІРІМ.
Кешірімнің синонимі екен ғой,
Төрт әріпті"АДАМ"деген есімің.
Әлтай Аманжол