Мойын остеохондрозына пайдалы массаж

Май мен тұз
Оны мойындағы остеохондрозға қолданыңыз
Остеохондроздың азабын қазір ересектер түгілі, орта жастағы адамдар да біледі. Миға жеткілікті түрде оттегі баруын тежеп, салдары қан қысымы, көздің қарауытуы, бас айналуы, тіпті қолдың ұйып қала беруіне дейін жеткізетін оны өзіңіз де емдей аласыз. Емі мынадай:
Тазартылмаған өсімдік майы (оның өткірлеу иісі болады) мен өте ұсақ теңіз тұзы керек. Он ас қасық тұзға 20 ас қасық майды құйып, біркелкі болғанша араластырады. Тұздың толық еріп кетуін қадағалаңыз. Оны күнде араластыра отырып, 3 күн салқындау қараңғы жерге қоясыз. Ақшылтым түсті біркелкі қою ботқаға айналуы керек. Осы майды желкеңізге жағып, сәл батыра, тері қызғанша уқалай отырып массаж жасайды. Бірінші күні 2 - 3 минут уқаласаңыз жеткілікті. Денеде суық болған жағдайда май бірден сіңіп кетеді. Екінші күні 4 - 5 минут уқалайсыз. Осылай әр күні май мөлшері мен массаж уақытын ұзарта отырып, соңғы күндері 20 минуттан массаж жасайды.
Май денеге сіңгеннен кейін қалғанын жылы суға малынған дәкемен сүртіп тастайсыз. Тұз түйіршіктері ірілеу болса тері жараланып, аздап ашуы мүмкін. Бірақ ем курсының соңына қарай тері тез қалпына келеді, ашығаны басылуы тиіс. 8 – 10 күннен кейін ұйқыңыз бұрынғыдан жайлы, көру қабілеті жақсарған, ойыңыз сергек тартқанын байқайсыз.
Май мен теңіз тұзы аралас массаждың көмегімен мойын омыртқасы айналасындағы бұлшық еттерде қан айналымы, зат алмасуы жақсарады. Сезімтал адамдарда қан айналымы реттелгенде алғашқы күндері бас айналғандай сезім болуы мүмкін. Одан қорықпаңыз.
Бұл ем мойын тұсындағы остеохондрозға арналған.
Ержан ҚУАНЫШБАЕВ.
Алматы қаласы.
«Ауырмаңыз!» газетінен алынды.