Қонақ құдайдың елшісі

Қонақ құдайдың елшісі
Бір әйел кісі күйеуінің үйіне көп қонақ ертіп келетінін, соның себебінен қиындыққа тап болып қалатындығы жайында пайғамбарымызға (саллаллаһу әлейһи уә сәллам) шағым айтып келеді. Бірақ ол әйел айтқан шағымына байланысты пайғамбарымыздан ешқандай жауап ала алмайды.
Аз ғана уақыттан кейін пайғамбарымыз әлгі әйелдің күйеуіне:
- Бүгін сіздің үйге қонаққа барамын - деп сәлем айтып жібереді.
Пайғамбарымыздың үйінде қонақ болатынына өзі де, әйелі де қатты қуанады. Әйелі бар тәттісі мен дәмді тамағын әзірлеп дастарханына қояды.
Пайғамбарымыз үйлерінде қонақ болады. Үй иелеріне дән ризашылығын білдіріп, үйден шығарда күйеуіне айтады,
- Мен үйлеріңізден шығып бара жатқанымда әйеліңіз есіктің табалдырығына қарап тұрсын - дейді.
Әйелі пайғамбарымыз үйден шығып бара жатқанында, онымен бірге ілесіп, үйден құрт - шаян және басқа зиянкестердің шығып бара жатқанын көріп көзі шарасынан шығып кете жаздайды.
Сонда пайғамбарымыз артына бұрылып:
- Міне осылай әрбір үйіңнен шыққан қонақтардың соңынан ілесіп үйіңнен бар бәле, зиянкес жын - жыбыр да бірге шығып кетеді. Еш ренжімей қонақты күтіп - шығарып салудың да хикметі осы. Алла қонағы көп болған үйді, үй иесін жақсы көреді - дейді.
Үлкенге де кішіге де есігі ашық болған үй - қандай жақсы үй.
Ондай үйге Алланың берекеті мен рахметі жауады.
Алла елшісінің тағы бір хадисінде:
- Алла бір қауымға жақсылық қаласа, оған сый береді - дейді.
- Ол неғылған сый?_ - деп сұрағанында,
- Несібесі өзімен бірге келетін және үй иесінің күнәсін бірге алып кететін қонақ - деп жауап береді.
Пайғамбарымыздың қонақ күтудің артықшылығы жайында айтқан басқа да хадистерінде: "Қайсы бір үйге болсын қонақ кірмей, періштелер кірмейді", "Қонақты күту жәннатқа кіретініңнің дәлелі", "Кім Аллаға және ақыретте (әрбір ісіне есеп беретініне) сенсе, қонағына құрмет көрсетсін" - деген.
(Арабшадан аударған Ержан Назарбек)