Бала туралы өлеңдер

Тәй - тәй
Өлеңін жазған – Е. Елубаев
Әнін жазған – Ш. Жағыпаров
Сені қашан көрем деп,
Үйге асығып жетем.
Үлбір беттен өбем деп,
Ұшып - ұшып кетем.
Қайырмасы
Тәй - тәй,
Тәй - тәй,
Күле қойшы, бөпешім.
Тәй - тәй,
Тәй - тәй,
Жүре қойшы, бөпешім.
Қатарыңнан кем болма,
Ер жеткенде, бөпем.
Қанаттасым, сен барда,
Жетер көкке төбем.
Атаның әлдиі
Ал, Қуаныш, Қуаныш,
Сені етейін жұбаныш.
Алғадайым өлгелі
Боп кетіп ем жылағаш.
Ермек болып отырсаң,
Мен бір әнге салайын.
«Ата, ата» деп келген,
Айналайын, алайын.
Ақ бетіңнен өпкен соң,
Жүрегімді жамайын.
Көңілімді шат қылсаң,
Көтеріліп қалайын!
Ж. Жабаев

Перзент жыры
Сен менің мәңгілікке өлмес атым,
Атымды ап алыс жылға жалғасатын.
Әкеде өсиет бар өмір жайлы,
Балада қасиет бар алға асатын.
Сен менің ұшар басым биіктеген,
Жолыңа тапқанымды үйіп - төгем.
Сен менің дүрсілдеген жүрегімсің,
Қай нәрсе сол жүректен сүйікті екен?
Сен мені өскен сайын ойландырып,
Заңдарын табиғаттың ойға алдырып.
Бір қадам басқан сайын өзің мені
Барасың шежіреге айналдырып...
Т. Айбергенов