Дос керек маған...

Дос керек маған...

Бұл көңіл деген бола бермейді - ау босқа алаң,
Шарқ ұрып кейде іздейді екен дос - жаран.
Айналам толы ниеті түрлі пенделер,
Шегінем бір рет -
Тастасам алға қос қадам.

Адымды аңдап баспасаң, күнім, болмайды,
Күлкіге қалып, соқадай басың сорлайды.
Өзіңді - өзің қадірлемесең бұл күнде,
Басқалар келіп аяусыз сені қорлайды.

Дос керек мынау жалғанда, жаным, дос керек,
Бой түзеп өсер шынардай шыңда - қос терек.
Сыртыңнан мақтап,
Бетіңе айтар қатеңді,
Сүйрейтін алға абыроймен ғана көшті ерек.

Жалғанның мынау өтпейді - ау күні жалғансыз,
Талай рет содан құлазып көңіл, қалған сыз.
Осындай кезде ұмытып өмір күйбеңін,
Дос іздеп кеткің келеді екен армансыз.

Дос тапсаң күнде анаңдай көріп амандас,
Дос керек маған,
Дос керек саған, замандас.
Жаныңды ұғар қасыңда бір дос болмаса,
Тентіреп қана кетеді екен қараң бас.

Дос керек саған,
Дос керек маған, алтыным,
Өлшенер доспен қадіріңменен бар құның.
Досыңның бары бақытың - жарты байлығың,
Жаныңды ұғар досыңның жоғы жарты мұң.

Санжар Ғұлама