Мың сөздің орнына «рахмет», деп бір-ақ сөзбен алғыс білдіріңіз!

Мың сөздің орнына «рахмет», деп бір-ақ сөзбен алғыс білдіруге болады.

Әлемде бағаланбай жүрген сөз болса ол «рахмет» сөзі болса керек. Бұл сөзді қандай жағдайда қолдансаңыз да лайықты бола кетеді. Көпшілік менімен келіседі деп ойлаймын. Олай болса, неге осы бір ғана сөзді айтудың орнына, бас-аяғы жоқ мың сөзден сөйлем құрауға тырысамыз.
Ендеше, мың сөздің орнына татитын "рахмет" сөзінің қолданылатын орнын анықтайық.

1. Сізге қошемет көрсеткенде (комплимент айтқанда).
Сіз сенбегенмен де, адамдардың арасында қошеметті (комплимент) дұрыс қабылдай алмайтын адамдар да бар. Мүмкін, сіз де солардың бірі боларсыз. Сіздің атыңызға жасаған қошеметтен ләззат алып көңілденудің орнына, мақтаншақ болып көрінбеуге тырысып, оның артық екенін айтып, ұяла бастайсыз. Бірақ ол сізге жағымды сөздерді шын жүректен айтып отырған болар, келесі жолы ол ондай сөзді айтудың қажеті бар ма, жоқ па,- деп ойланып қалуы әбден мүмкін.

Мысалы: «Көйлегің өзіңе сондай жарасып тұр!
Дұрыс емес: «Ой, бұл ескі көйлек, мұны қашан сатып алғанымды да ұмытып қалдым!»
Дұрысы: «Рахмет! Сізден мұндай сөздер естігеніме қуаныштымын!»
Өз атыңызға айтылған қошеметті қабылдай отырып, өз мүмкіндіктеріңіз бен жетістігіңізді мойындайсыз. Қошеметті қабылдамау жеткен жетістігіңізді бағаламауды білдіреді. Келесі жолы қысқа ғана «рахмет», деп айтуды ұмытпаңыз!

2. Сіз кешігіп қалдыңыз!
Иә, мұндай жағдай екі жаққа жағымсыздық туғызары анық – бұл сізді күтіп отырған адамды сыйламаудың белгісі болып көрінеді және сіз стресстік жағдайда келдіңіз. Мұндай жағдайда алғыс білдіруді орынсыз деп есептейсіз де, кешігуіңіздің себептерін айтып түсіндіруге тырысасыз. Ендеше, тексеріп көрейік, қайсысы жөн екенін өзіңіз қабылдайсыз.

Мысалы: сіз кездесуге 15 - 20 минуттай кешігіп келдіңіз.
Дұрыс емес: «Өтініп кешірім сұраймын, автобусты күтіп көп тұрып қалдым, ол аз болғандай кептелісте тұрып қалдық»... (осылай жалғаса береді).
Дұрысы: «Мені күткеніңізге рахмет!», немесе «Шыдамдылық танытқаныңызға рахмет!».
Осылайша, келеңсіздік жағдайға кешірім өтінбей, алғыс білдірген әлдеқайда орынды.

3. Сізді сынға алған сәтте.
Сынның әр түрі болады – пайдалысы, пайдасызы, өш алуға қатысты әділетсіз сын да айтылады. Бірақ нәтиже біреу – сын ешкімге ұнамайды. Кез келген сынға алғыспен жауап қата отырып, зиянды әсерін ауыздықтай аласыз. Түрлі негативтен босап, жеңімпаз болу үшін алға қарай жылжисыз.

Мысалы: «Сіз тапсырманы орындай алмадыңыз. Біз сізге мұны сеніп тапсырып едік, мүлде басқа нәтиже күткен едік».
Дұрыс емес: «Өтінемін, кешіріңіз! Мұнда шұғыл шаруалар болып қалды. Оны басқаша істеуіме болатын еді мынандай жағдай орын алмағанда....».
Дұрысы: «Менен жоғары нәтиже күткеніңізге қуаныштымын, рахмет!»

4. Жұбату немесе қолдау кезінде.
Кейде жақындарыңыз бен достарыңызға қолдау көрсетуге тура келетін жағдайлар өмірде көп кездеседі. Ондай сәтте жұбатуға айтар сөз таппай қаламыз. Жұбатамын деп мүлде орынсыз сөздер айтып қалатын кездер де болып қалады.

Мысалы: Әпкеңіз күйеуімен ажырасқалы жатқанын естіген кезде.
Дұрыс емес: «Балаларың өсіп келеді, солардың барына шүкірлік ет!»
Дұрысы: «Жаным сырыңды менімен бөліскеніңе рахмет! Мен әрқашан сенімен біргемін!»
Мұндай сәтте жүрегіңді жарып шыққан қандай жылы сөз болсын, ол адамды жұбата алмайды, алайда сізге сенім артқанына алғысыңызды білдіріп, қасынан табыла білгеніңіз жөн.

5. «Рахмет» деп жиі айтыңыз.
Кейде таң қаласың, тым артық алғыс білдіріп жататын адамдар да бар! Жұмыста кішкене көмегіңіз тисе тәттісін алып келетіндерді де жиі кездестіретін боларсыз. Атай берсек мұндай жағдайлар өте көп.
Ал, сіз шын көңілмен, қысқа ғана «рахмет» деп алғыс білдіруді үйреніңіз!

Дайындаған: Жадыра.